`बाढिपहिरो सरकारले बोलाएको होईन´:प्रधानमन्त्री ओलि।।

समाचार समाज

काठमाडौँ । प्रधानमन्त्री केपी शर्मा ओलीले सरकारले जतिसुकै राम्रो काम गरेपनि जस नपाएको बताएका छन ।

उनले विरोधीहरुले सरकारको राम्रो कामको पनि विरोध गर्ने गरेको भन्दै आक्रोश व्यक्त गरेका छन् । उनले अहिले आएको बाढी पनि सरकारकै कारण आएजस्तै प्रचार गरिएको धारणा राखे ।

प्रधानमन्त्री निवास बालुवाटारमा बुधबार बसेको विपद् जोखिम न्यूनीकरण तथा व्यवस्थापन राष्ट्रिय परिषद्को बैठकमा उनले सरकारले जनताका लागि निकै राम्रा काम गरेपनि बिरोधीहरुले त्यसलाई देख्न नसकेको तर्क गरेका हुन् ।
प्रधानमन्त्री ओलीले बाढी पीडित जनताका लागि आवास लगायतका सबै व्यवस्था सरकारले गर्ने बताए । त्यस्तै उनले नयाँ जनमत लिन जनताको माझमा जान निर्वाचन घोषणा गरिएको तर विपक्षी दलहरू भने निर्वाचनदेखि अतालिएको बताए ।

संसारमा कुनै पनि राष्ट्रमा अदालतबाट बनेको सरकार दिगो र सफल हुन नसकेको उल्लेख गरे । प्रधानमन्त्री ओलीले चूरेको विनास नभइ संरक्षण गर्न सरकारले उचित व्यवस्था गरेको तर्क गरे ।

चूरे विनास गर्ने सरकारको कुनै उद्देश्य नरहेको भन्दै प्रधानमन्त्री ओलीले सरकारले खानीको मात्र उचित प्रयोग गर्ने जिकिर गरे ।

बैठकमा ओलीले बाढी पहिरोबाट घाइते भएकाहरूको उपचारको व्यवस्था सरकारले गर्ने, क्षतिको मूल्यांकन गरेर उचित राहतका लागि गृहमन्त्रालयले पहल गर्ने बताए । उनले उद्धार गर्दा अपाङ्गता भएका जेष्ठ नागरिक, बालबालिका, गर्भवती महिलालाई प्राथमिकतामा राख्न निर्देशन दिए ।

बैठकमा विपक्षी दलका नेताहरु भने सहभागी भएनन् । परिषदमा सरोकारवाला मन्त्री, विपक्षी दलका नेता, सबै प्रदेशका मुख्यमन्त्री, राष्ट्रिय योजना आयोगका उपाध्यक्ष, मुख्यसचिव, प्रधानसेनापति, राष्ट्रिय विपद जोखिम न्यूनीकरण तथा व्यवस्थापन प्राधिकरणका प्रमुख कार्यकारी अधिकृतलगायत सदस्यका रूपमा रहने व्यवस्था छ।

Leave a Reply

Your email address will not be published. Required fields are marked *